Parodi Situasi*****
Assalamu’alaikum……….
Klamit…luuurrr…..
Para Sedulur
mBanyumasan ngapak, kabeh…! neng ngendi
paran…. pendonga inyong… moga-moga rika
pada sing olih rahmat karo hidayah sekang Gusti Alloh sing gawe urip.
Sedulur
inyong sing bagus lan ayu dhewek…., kayane nembe sepisan kiye Kang Wirya nemoni
rika pada nganggo basa sorogan (pengantar) mBanyumasan. Ora ngapa-ngapa embok…?
Etung-etung nggo ngleluri nglestarekaken budaya para leluhur sing wis ndisiti
inyong padha. Sing penting di jajal
dimin, mbok menawane bisa ceples, mergane wis telung puluh tahun lewih ora
manggon bareng wong sing basane mBanyumasan ngapak. Arane wong urip… ya
separan-paran koreh nggolet cucukan wong mbokan kendhile miring.
Jane kepenginane
ya ngumpul sedulur, perek-perekan…dadi bisa endhong-endhongan lan angger ana
apa-apa bisa gagean lung-tinulung.
Guru ngajiku
gemiyen angger mulang sok karo glewehan (guyon), tau ngomong kaya kiye: ”aja
wedi lunga sekang kampung nggolet kodhen, wong manuk sing ora duwe kampung, ora
duwe umah, ora duwe lumbung pari baen… uripe seneng; bisa mangan… ketrima bisa
umah-umah, duwe anak bojo, asal wetenge wis wareg … padha reang tembangan karo
kanca-kancane”.
Lhaa… wong
menungsa tolih duwe utek, duwe kepinteran lan duwe ketrampilan… mesthine
kepengin urip sing lewih mapan lan ana regane (berkwalitas)…..aja dipadhakena
karo manuk? Kyaine maning…..!??
Sing garep
tek omongena maring rika padha kiye dudu babagan manuk utawane kumpulan erte-erwe,
nanging urusan kendhil miring…!
Wis Mandan sawetara
wektu kiye pirang-pirang regan barang-barang kebutuhan urip padha mundhak,
larang pisan ora eram… nganti bakul baen sing biasane ora tau demo pada mogok
wegah dodol… mendhing tutup warung melu demo karo kanca-kancane.
Jaman
mbekana masalah dol-tinuku sing biasane protes disit kuwe ya sing tuku… mecicil-mendelik
maring bakule karo nylathoni…”rega koh larang temen, dodolan kaya maring wong
ora kenal baen, rika karo inyong toli wis nglanggan suwe…aja kaya kuwe”, kuwe
gemiyen…..!
Lhaa…angger
jaman siki, wis ana wolak-waliking jaman, sing tuku wis ora teyeng protes, arep
ngotot pendelak-pendelika..ora ana regane…. wis ora digople….! teyenge yaa.. mung ngusap dhadha thok. Apamaning urip neng kota, sing apa-apa ana baen
angger garep tuku-tuku tetep kudu nganggo dhuwit, ora bisa tuku karo godhong
utawane pecahan kreweng,…bisa nganggo godhong gedhang tapi kehe kudu sa
trak…wong didol disit.
Inyong ya
lagi mengeng (basa aluse lagi njudeg), kaya ngapa ya sedulurku sing neng kampung,
kahanane serba cupet…., apa ora mung kami thethelen kaya kethek ditulup,
linga-lingo, kiye keprimen garep polah apa…?, endi sing kudu didhisitena? sedheng
kebutuhane padha karo wong kota, kudu mangan, nyandhang, nyekolahena bocah,
modal dagang utawane biaya tani… jan.. mesthine
ya bingung banget toli..?
Dhong wektu semana
sing larang regane bensin.., mbasa regane garep diundhakena maning nang
Pertamina di demo karo masyarakat, regane ora sida munggah, dadi awake dhewek
mandan ketulung sethithik, bisa lungan senajan nunggang bis umum utawa sepeda
montor, lumayan mandan ngirit. Ngenani
kahanan larange rega bensin, sing adem-ayem ora keganggu ya mung tukang dokar, tukang
grobag sapi, tukang prau gethek karo tukang becak…sebabe ora mawi bensin.
Pancen sih bensine irit, paling-paling butuhe sethithik ngarah dienggo
nglengani korek api… nanging sega karo wedang kopine mandan boros luuur…
Perkara BBM
lagi mandan asooh semendhing….., ana maning iwak sapi regane amleng-amleng jleg
duwur nganti satus ewu sekilo….., eladalaah… meled-meled, bakul sate, bakul
gepuk, warung padang, tukang abon, karo tukang daging pada kami-tenggengen, theleg-theleg,
semelang gumun, wong rega munggahe ora baen-baen nganti satus presen sekang
rega maune. Tukang dodolan iwak sapi neng pasar suka mrei…mergane angger
dodolan terus bisa-bisa dadi nggon paidon utawa protese sing garep tuku iwak
sapi…! dadi mendhing turu nang ngumah ngenteni rega stabil.
Menteri
Pertanian, Menteri Perdagangan, Importir sapi, nganti Mantri Pasar diundang
kabeh ditakoni, diinterogasi kiye keprigen rega iwak sapi nganti bisa kaya kiye?...
rega koh munggah nganggo sekarepe dhewek. Jawabane koor bareng-bareng… ”spekulaaaan”……
eh… menungsa sing rumangsa dadi spekulan tukang main ngothak-athik rega sapi ya
ngrameni gawe issue liwat koran; jere stock sapi lanang langka, produksi ternak
sapi lokal mung sethithik nganti sapi wadon baen disembelehi, dadi kudu
ditambahi import maning sekang Ostrali utawa New Zelan…. Eh…dijawali nang Menteri Pertanian karo
Menteri Perdagangan.…jere miturut data; sapi lokal populasine cukup, sapi wadon
ora nana sing disembeleh, paling-paling sing wis tua utawa sing wis ora
produktip, kran import ora susah dibukak kambanen mengko rega sapi lokal bisa
ajur mumur…..! akuuuur pak Menteri…..
Sabubare rame-rame soal sapi, rega iwak sapi alon-alon temurun maning.
Untunge
inyong ora tau madang neng restoran, ketemu panganan iwak sapi baen angger ana
slametan utawa ditukokena mantu inyong.
Kayane ingon-ingon nang pekarangan mburi cukup dienggo ngunggahaken gizi
keluarga. Kepengin nyembeleh ayam kari
ndimek, kepengin iwak trewelu kari nyembeleh, arep mancing gari maring kali
utawa mblumbang mburi, garep gorengan welut ya gari ngurek neng sawahe
tanggane. Mung upamane garep slametan
pesta sing mandan gedhe ya nyembeleh wedhus, ora nyembeleh sapi…kegedhen iwake,
mbok ora entong……..
Istilah Kyai
Gusdur: ”Kaya kuwe baen repot”…hehehe…ujarku rame temen lakon kiye…yaa…?
Ora let suwe
kedele langka, regane larang, dadine dulur-duluranku para pengrajin tahu-tempe
sambat, mergane biaya produksi ora ketutup.
Masa iya usaha montang-manting nganti kaya tempaling olih-olihane
tekor. Angger diterusena ya mesthine bisa
gagean bangkrut. Wektu kuwe sing demo
malah para bakul nang pasar, pengrajine dipeksa gawe tahu-tempe maning, aja
mandheg….
Pengrajin
tahu-tempe meneng theleg-theleg kemlengeren.
Konsumen
tahu-tempe padha koloh jenthik, ora bisa mangan mendhoan, apamaning tahu
Sumedang. Pemrentah kalang kabut nggolet solusi keprigen carane ngatasi
persoalan kiye,
Mentri
Perdagangan, Menteri Perindustrian, Menteri Pertanian kabeh dikumpulaken perlune
ngrembug babagan rega tahu-tempe sing ora sebaene lan barange langka nang
pasar. Apa sebabe kedele langka, pertanian
palawija gagal?, impor sering tapi
barang neng pasar langka apa kedelene ditumpuk (ditimbun)..? sarana
transportasi nggo ngangkut kedele wis ana lan mulus kabeh, nanging ya kuwe
distribusi kedele ora wrata…. duh
biyung….! kedele…., kedele….minggat
ngendi kowe?
Kae deleng….para
spekulan kedele cengar-cengir kebungahen, wetenge nganti mlendung kaya wong
meteng, wudele baen bodong nganti mengo….. tempe…. tahuuu… tempe…. tahuuu.. panganan
bergizi go wong sing duwe dhuwit,… lha wong penginyongan mangan saben dinane go
ngganti iwak supayane bergizi ya diganti sekang tahu karo tempe sing murah,
siki tahu-tempe langka, apa garep diganti maning nganggo tempe bongkrek? Bisa-bisa
padha mendem (keracunan), angger dipeksa inyong pada bisa gelis mlebu ngluang. Gemlethek temen inyong seduluur….
Rega
tahu-tempe wis normal terkendali, ehhh…kabar paling anyar kang beyung bocah
jere rega bawang karo brambang padha munggah ya nganti tekan satus ewu maning sekilo.
Ibu-ibu, pedagang, pemrentah sing dadi regulator sontak koor bareng “kiye kudu
cepet-cepet diatasi, apa mangan kudu ngasrep utawane masakan mung diceplungi
uyah thok? Kebangeten temen…. Spekulan
goli gawe kisruh pinter temen deneng…..apa ora eling maring Gusti Alloh, apa
neng dunya arep urip dhewek?”.
Anane rega
barang larang ora terkendali, kabeh-kabeh munggah rega nganti satus ewu…, neng
pasar langka, distribusine ora mrata, kiye mretandani sing diwehi tugas ngurus ora
becus, ketungkul sibuk ngurusi masalahe dhewek thok. Sistem ketahanan pangan ora
jalan, utawane kakehan peraturan rumit (regulasi) sing ora perlu, istilahe “kedawan
gagang” cilaka temen inyong padha seduluuur, apamaning mengko gutul
anak putu inyong padha garep keprimen?
Sing dadi
pejabat publik akeh sing ora amanah, pegaweyane ngumpulena barang mewah, umah
mewah, pekarangan utawa kebon sing amba, montor model anyar, bojo enom sing
ayu-ayu, …pokoke apa baen sing bisa diusung digawa bali ngumah ditumpuk kaya
tikus wirog lagi angrem……
Badan
legislatif sing kudune dadi panggonan gendhu-gendhu rasa (tempat penyampaian
aspirasi) wis ora kena diendelaken, sebabe kupinge wis padha budheg, ketungkul
ngurusi kasuse dhewek… dadine wong arep nyaluraken aspirasi sing kudune liwat
pejabat eksekutif utawane legislatif salurane wis ketutup, kepeksane nganggo dalan
pamungkas, demo mbeker-mbeker nganggo TOA nang ngarep kantor dewan, kantor
pemrentah, utawane panggonan strategis liyane, ngarahe wong liwat utawane sing
simpati padha krungu.
Ngarepi
kahanan kaya kiye Kang Wirya dadi “Klenger ngadeg”.
Kanggo bahan
pangemut-emut sedulur pada kiye ana kutipan piwulange Pujangga Ronggowarsito, nggambaraken : ”Jamane
jaman edan, yen ora melu ngedan ora keduman”, -- ”sak begja-begjane wong kelalen, esih begja wong
sing eling lan waspada”
(basane
di-mBanyumasaken).
Sedululur
mBanyumasan ngapak, mageh bareng-bareng nyonto perjuangane para suwargi leluhur
sing wektu uripe duwe kelakuan lenceng lan amanah, rila lahir-batin merjuangaken
bangsa lan agamane kaya dene: Pak Dirman, Pak Gatot, Pak Susilo Sudarman, Pak
Parjo, Pak Pujadi, lan liya-liyane preyayi mBanyumas egin akeh maning ora bisa
tek sebutena siji-siji…wong inyong kelalen….pokoke kawit jaman gemiyen tekan
siki…sing uripe ora neka-neka ya kuwe didadekena conto.
Sedulur
mBanyumas ngapak, ndaweg pada ndonga maring Gusti Alloh sing Maha Kuasa
moga-moga inyong karo rika pada sekeluarga diparingana kuat, waras, slamet oranana
alangan lan sambekala, urip ayem tentrem, cukup nyandang-mangan, kumpul anak
putu..kanthi bahagia, bisa mbangun keluarga sakinah lan warrohmah.
Amien. Klilaan….wasalam…
Doc. by Bio
